Albergue
con la ayuda de: Consejería de Turismo y Cultura
 
Contador gratis

L'ESPACIU AGRARIU

Mª Esther García López

     La parroquia de La Montaña de Ríu Negru tien n’actualidá 782 habitantes, según el Padrón Municipal del Ayuntamientu de Valdés del añu 1996. La población ta más bien compuesta por xente adulta ya xubilaos. Hai mui poucos nenos. Los habitantes tán distribuíos n’aldeas ya brañas. Los l.lugares consideraos brañas son los pueblos de Coucernosu, Busecu, Arnizu, Riupinosu ya Riusecu ya los outros son aldeas: Siñeiriz, El mazu, Los Piñeiros, La Degol.lada, Funtanavia, El Solanu, El Rebol.lar, El Teixidal d’arriba, El Teixidal de Baxu, Belén, La Urdubaga, Las Tercenadas, Los Conqueiros, La Carboniel.la, Menudeiru, Zreizal, Caxous, Paladeperre, Barceda, San Playu, Godón ya La l.linera.
Hasta los años 60 yara más bien, una economía de subsistencia. Cosechábanse patacas, maíz, dalgo de trigu, fabas, berzas ya rabizas. A partir de los años 50-60, entamó un resurdimientu de la ganadería ya tamién en parte de del.los productos agrícolas. Encomenzó a semase patacas pa vender, ya entamó a vendese el l.leite pa las fábricas, entamando asina un procesu que feixo que se potenciase enforma la ganadería. Deixáronse muitas tierras a prau ya fixéronse nuevas praderías. Sustituyéronse las cortes de vacas roxas por vacas ratinas ya holandesas que daban más l.leite, anque tamién yaran más blandas ya nun servían pal tiru. Esti procesu continúa güei nas modernas esplotaciones, onde los más xóvenes las trabayan nas casas que l’hacienda lo permite, ya nas que quedóu xente pa trabayalas. Outras muitas casas na parroquia La Montaña, al xubilase los vieyos, morrió con el.los l’agricultura ya la ganadería, ya tamién pola mor de las cuotas l.leiteras que feixo deixar la esplotación a los que nun tenían un mínimu de vacas. Yá posible que nun vuelva a resurdir, ya nas próximas décadas cuando se xubilen los qu’agora tienen 45-55 años, nun se sabe cual vei ser el futuru de las esplotaciones nas que los más xóvenes se fueron a estudiar y/ou trabayar a la capital; será difícil que tornen a la aldea a trabayar col ganáu. Dotramiente la natalidá disminuío muito ya quedan casas unde nun se casóu nadie pa casa, hai abondos solteirones.
     Amás de la agricultura ya ganadería, había quien se dedicaba a outros oficios na parroquia, madreñeiros, (en Belén, Urdubaga ya en Menudeiru) ferreiros ya outros artesanos que facían ferideras, estiles, mangos pa las ferramientas etc. Entá güei queda nel pueblu de Belén un madreñeiru, el perconocíu en toa Asturias Milio Feito de casa Carramín. Tamién ta la fragua de casa Conrado en Las Tercenadas, pero tampoco ta en usu.
Esti trabayu ta feito tomando como prototipu la aldea de La Degol.lada, pero puede facese estensivo a los outros pueblos de la parroquia ya que las diferencias son mínimas. Únicamente las brañas que siempre se dedicaron más al ganáu pero hai muitas cousas nas que coinciden. 
Nos caberos años, las cousas fueron cambiando. La población avieyóu enforma, ya los poucos mozos que se quedaron n’aldea meyoraron la esplotación, utilizando maquinaria ya introduciendo nuevas técnicas. Asina unos pasaxes d’esti trabayu fan referencia al pasáu próximu entovía; outros van en presente porque inda se siguen faciendo. Valga pa que quede por escritu los l.labores d’antañu y la forma d’esplotación del espaciu agrariu ya que, col pasu’l tiempu, nun s’escaeza lo que tantos años foi la forma de vivir de la nuesa parroquia.

 

FONTES CONSULTADAS:
Informantes: Esther López García, Ricardo García Pérez ya Joaquín García Pérez.
La mías vivencias na aldea de La Degol.lada, l.lugar unde nací ya paséi la mía infancia ya mocedá.
Bibliografía:
GARCÍA GARCÍA Ernesto, GARCÍA LÓPEZ, Mª Esther,(1999): La matada en La Degol.lada (Valdés). Cultures, nu 9. p.p.359-373. Uviéu. Academia de la Llingua Asturiana.
GARCÍA LÓPEZ, Mª Esther (1989): Rel.lumos folclóricos d’occidente. Lletres Asturianes. Uviéu. Academia dela Llingua Asturiana.
VILLALAÍN FERNÁNDEZ, José (1915). Topografía médica del Conceyu de Luarca. Madrid. Anales de la Real Academia de Medicina.
Padrón Municipal. Ayuntamientu de Valdés.
Llibru d’actas de matrimonios de la Parroquia de La Montaña de Rionegro (Valdés) 1897-2000.