Albergue
con la ayuda de: Consejería de Turismo y Cultura
 
Contador gratis

L'ESPACIU AGRARIU

Mª Esther García López

El maíz

En La Degol.lada semábase maíz tanto pa pan como pal ganáu. Cada vecín semaba unas cuantas tierras, ya que yaran de propiedá particular. Cuantas más se pudieran semar, meyor, pues yara’l pan de tol añu. Agora sémase en del.las casas pa ensilar, pero sémase muitu menos qu’anantes. 
El maíz sémase nel mes d’abril ya en mayu. Pasábase-y a la tierra la sal.ladora ou la canadiense, ya despuós gradábase p’achanar la tierra. L.lueu echábase-y el cuitu ya l.labrábase col aráu, volvía a gradase. Cuitábase ya l.labrábase col aráu pa que quedara el cuitu bien enterráu. Despuós semábase col besadoiru; iban faciéndose los riegos ya echando el maíz. L.lueu facíase cola semadora. Despuós había que volver a gradalo pa que nun lo comieran los páxaros, sal.lalo, ya arrendalo. Anantes de sal.lalo iba una persona delantre arelantándolo, arrancando algún casu pa que quedaran a una distancia que-ys deixara medrar. Cuando ya taba panoyáo, volvía arelantase pa que medrara más y esti yá s’aprovechaba pal ganáu.
N’ochobre segábase’l maíz, facíase en morenas grandes pa que se fuese refiendo, ya despuós escanábanse las panoyas. De los casos facíanse capiel.las que se ponían a curar ya cuando ya taban bien curadas, facíase’l varal de la maíza, pa da-ysla a las vacas pol iviernu; esti yara un varal paecíu al de la hierba, qu’acababa en picu. Poníase-y de cubierta un bon brazáu de paya de centén atada, qu’entrara na l.lata ya esparcíase pa que cubriera’l varal. Amarrábase con l.liatos de paya de centén y amarrábase bien la l.lata pa que nun calara. 
Las panoyas l.levábanse pa casa a carros, amontonábase na cocina, no pasiellu, ou na panera, dependiendo’l sitiu que tuvieran nas casas. Facíase un bon montón ya preparábase l’esfoyón. Al esfoyón l.lamábase p’ayudar a los vecinos ya a la familia. L’esfoyón duraba hasta la madrugada. Facíase dalgún descansu y servíase la sobrecena, que yaran castañas cocidas ou asadas, chocolate, ya unas copinas d’anís.
L’esfoyón yara sitiu de gayola. Al.lí cuntábanse cuentos, cousas de miedu, chistes picantes, ya cantaban cantares perguapos. Los nenos solían ponese no picu’l montón. Prestába-ys muitu cuando salía una panoya roxa, l.lamávbase la reina, ya tenía unas barbas roxas. Los nenos xugaban a ponelas de bigotes. Iban al que más reinas topara. Tamién había dalguna panoya pinta, con granos negros ya mariel.los. Había panoyas que tenían fíos, un panoyín apegáu. Dában-yslas a las vacas porque decían qu’asina salía pronto al toru ya quedaba la vaca preñada.
Despuós d’esfoyar había qu’enrestrar. L’enrestrador solía ser un home. Si había muitu qu’enrestrar l.lamaban más xente, pa enrestrar ya p’ apurrir. Unos apurrían las panoyas (tenían que ser dos) ya los nenos apurrían la paya, anque nun-ys gustaba muitu, porque –ys daba’l sueñu. Las riestres de maíz colgábanse nel horriu ya no corredor ya si nun cabían armaban una l.lata pa colgalas (dos palos en forma de forcáu que suxetaban un palu n’horizontal pa colgar las riestres).
Anantes de l.levar el maíz al molín había que desfacelo. Quedaban los caruezos, muito bonos pa prender ya tizar la cocina porque daban muitu calor. Los nenos xugaban con el.los fiendo casas mui altas

 

FONTES CONSULTADAS:
Informantes: Esther López García, Ricardo García Pérez ya Joaquín García Pérez.
La mías vivencias na aldea de La Degol.lada, l.lugar unde nací ya paséi la mía infancia ya mocedá.
Bibliografía:
GARCÍA GARCÍA Ernesto, GARCÍA LÓPEZ, Mª Esther,(1999): La matada en La Degol.lada (Valdés). Cultures, nu 9. p.p.359-373. Uviéu. Academia de la Llingua Asturiana.
GARCÍA LÓPEZ, Mª Esther (1989): Rel.lumos folclóricos d’occidente. Lletres Asturianes. Uviéu. Academia dela Llingua Asturiana.
VILLALAÍN FERNÁNDEZ, José (1915). Topografía médica del Conceyu de Luarca. Madrid. Anales de la Real Academia de Medicina.
Padrón Municipal. Ayuntamientu de Valdés.
Llibru d’actas de matrimonios de la Parroquia de La Montaña de Rionegro (Valdés) 1897-2000.