Albergue
con la ayuda de: Consejería de Turismo y Cultura
 
Contador gratis

L'ESPACIU AGRARIU

Mª Esther García López

La tresformación de las collechas. Los molinos.

Una vez mayáu el trigu ya’l centén, guardábase en montones nel horriu, si nun cabía en montones, echábase en sacos. Un día que fixera aire había que ir abaliándolo pa poder molelu. Abaliábase na era ou nun llugar unde daba bien l’aire, y facíase col vanu, era redondo con unos aros de madera alredor ya un trozo de pelleyu d’uvea ou de cabra curáu que facía de base. Tamién se pasaba pol cribu, esti de la mesma forma que’l vanu pero cola base d’alambre finu, que deixaba pasar las arenas ya la tierra, pa que quedara’l granu bien l.limpiu pa l.levalu al molín.
En La Degol.lada hai dous molinos, el Molín de Pachín que garra l’augua del ríu Pequén ya’l Molín del Xastre que garra l’augua del ríu El Zurdu. Los outros vecinos molían nel molín de Funtanavia, propiedá de Casa Carmelona; pagaban una renta anual. Aquí paez ser que, polo menos nos caberos años nun había maquila. Cuando molían farina pa empanadas iban al de Reicéu, cerca de L.luarca, porque al.lí moíanlo más fino y más apulgao.
Los molinos l.lieban l’ugua por una presa hasta la canar. Faise nel ríu un banzáu que retién l’augua pa l.levala pola presa hasta’l molín. La presa tien que ser bien fonda, porque asina l’augua l.lieva muitu más fuerza ya muel meyor. L’augua baxaba dende la presa al molín pola canar. Na boca la canar l.lieban una rexa de fierru pa que nun pase la fuoya nin hierbas ya evitar asina que s’atranque. La canar acaba nel tufu, un tubu en forma de troncu de conu, de madera, bien suxetu con cuñas de ciernu de carbayu, pa que l’augua salga con más fuerza pa mover el rodeznu ya, al tiempu, muévese la muola dientru’l molín. El molín párase cola pechadoira.
El granu vei cayendo de la moxega pà la canalea y d’al.lí vei cayendo no furacu la muola. La canalea muóvese cola tarabica. Si por exemplu yara pal ganáu, convenía que la farina tuviera molida más gorda, con más salváu; si yara pa pan ou pa papas había molese más fina. Non todo’l mundu sabía da-y el puntu. A veces, las muyeres queixábanse de que lo molían espedazao. Tien que ir bien apulgáu el granu pa que quede meyor la farina. El molín hay qu’entendelu bien. Si s’apura la grana ya tán las muolas mui baxas enl.labastra, garra cinta la farina, nun da abasto a moler y tira la grana pol blandal. Dende hai unos cuantos años en tolas casas tienen molín eléctricu.
La farina hai que peneirala pa que quede inda más fina. La de trigu ya la de centén pásase pol bortel, que nun deixaba pasar nada de salváu. El salváu dábase-y al ganáu. Pa peneirar el maíz utilízase una penera un poucu más gorda; inda más gorda si ya pa farina de papas

 

FONTES CONSULTADAS:
Informantes: Esther López García, Ricardo García Pérez ya Joaquín García Pérez.
La mías vivencias na aldea de La Degol.lada, l.lugar unde nací ya paséi la mía infancia ya mocedá.
Bibliografía:
GARCÍA GARCÍA Ernesto, GARCÍA LÓPEZ, Mª Esther,(1999): La matada en La Degol.lada (Valdés). Cultures, nu 9. p.p.359-373. Uviéu. Academia de la Llingua Asturiana.
GARCÍA LÓPEZ, Mª Esther (1989): Rel.lumos folclóricos d’occidente. Lletres Asturianes. Uviéu. Academia dela Llingua Asturiana.
VILLALAÍN FERNÁNDEZ, José (1915). Topografía médica del Conceyu de Luarca. Madrid. Anales de la Real Academia de Medicina.
Padrón Municipal. Ayuntamientu de Valdés.
Llibru d’actas de matrimonios de la Parroquia de La Montaña de Rionegro (Valdés) 1897-2000.