Albergue
con la ayuda de: Consejería de Turismo y Cultura
 
Contador gratis

L'ESPACIU AGRARIU

Mª Esther García López

Pan de maíz

Pa facer la pasta tien que tar l’augua bien caliente, casi ferviendo. Puonse la farina no mediu la masera ya vei echándose augua ya revolviendo col cazu. Tápase la pasta con un cobertor ya cuando ta la pasta bien pa poder trabayalo, échase-y el formientu. Estrúñase (bien entre los didos ya déixase espel.lir. Una vez qu’encomienza a abrir yá ta abondo espel.lío. Si se deixa muitu tiempu pásase ya sal el pan puru.
Amás de la fornada de pan facíase’l rapón. Ya de dous tipos, ún cola mesma pasta del pan bien estirada ya entremeciendo cachinos de chorizu ya toucín, tapaos con una capa de pasta mui fina. Este cuezse nuna lata, sobre media hora. Otru yara’l que se facía dándo-y un fervor a l’augua con cebolla picada ya añadiendo un puñáu de farina de maíz ya unos rinchos de toucín frebudu. Estirábase enriba d’una berza ou de fueyas de figal ya cocíase na puerta’l fornu. Yara pa comelo anantes que salira’l pan.
El día que s’amasaba, xeneralmente ya s’acabara’l pan, entós pa xantar ou pa merendar, entre que’l pan nun salía del fornu, tostábanse na sartén, untada de toucín ou d’aceite, unos freixolones de la pasta del pan, que taban muito bonos. 
El día que s’amasaba yara un día señaláu. Las muyeres taban ocupadas tol día con estos l.labores. Todos taban deseando que salira’l pan caliente. 
El pan yara un alimentu básicu ya importante nas casas. Comíase entriáu con l.leite p’almorzar ya acompangaba a tolas comidas.

FONTES CONSULTADAS:
Informantes: Esther López García, Ricardo García Pérez ya Joaquín García Pérez.
La mías vivencias na aldea de La Degol.lada, l.lugar unde nací ya paséi la mía infancia ya mocedá.
Bibliografía:
GARCÍA GARCÍA Ernesto, GARCÍA LÓPEZ, Mª Esther,(1999): La matada en La Degol.lada (Valdés). Cultures, nu 9. p.p.359-373. Uviéu. Academia de la Llingua Asturiana.
GARCÍA LÓPEZ, Mª Esther (1989): Rel.lumos folclóricos d’occidente. Lletres Asturianes. Uviéu. Academia dela Llingua Asturiana.
VILLALAÍN FERNÁNDEZ, José (1915). Topografía médica del Conceyu de Luarca. Madrid. Anales de la Real Academia de Medicina.
Padrón Municipal. Ayuntamientu de Valdés.
Llibru d’actas de matrimonios de la Parroquia de La Montaña de Rionegro (Valdés) 1897-2000.