Albergue
con la ayuda de: Consejería de Turismo y Cultura
 
Contador gratis

L'ESPACIU AGRARIU

Mª Esther García López

L’espaciu agrariu en La Degol.lada (Valdés)
Los nomes de las casas

     En La Degol.lada hai cuatru casas que se l.laman ca El Peceiru, Ca Pachín, ca El Xastre y ca la Cruz.
La Casa El Peceiru. El nome de la casa vien d’un antepasáu que facía piezas pa los zancos, un calzáu asemeyáu a una bota, nel que la suela yara de madera, paecíu a una madreña, el tacón d’atrás como un cuartu tacu de zapatu, ya la parte d’alantre yara más plana, ensin talón, l.lueu tenía la parte d’arriba la caña la bota, feita de cueru. Éstas yaran las piezas que facía el Peceiru que-y l.lamában “Pericu las piezas”. Antes de tener esti nome l.lamábase la Casa Xuanón. 
La casa vieya, que foi vivienda hasta l’añu 1965, ta asitiada xunta l’horriu, tien apegada la casa’l fornu, construída nos años cuarenta. Ya de planta cuadrada, feita de piedra ya’l teyáu de chousa, con ventanes a ras de la parede. Tien dos alturas ya ta divídida por un pasiellu. Pa un l.lau taba la sala que recibía la l.luz d’una galería ya una ventana na fachada que da al sur; dous cuartos separaos d’esta por tabiques de madera, tamién con ventanas al esterior. Pal otru l.lau taba el l.lar, l.lugar ensin ventanas, namás la l.lumera nel techu; dende esti xubíase al cuartu d’arriba, únicu espaciu a más altura que’l restu, al que se xubía por una escalera de madera. Al final del pasiellu taba la corte las uveas, qu’ hacia 1945, arregláronla pa cocina, con una cocina “económica”, más moderna. Enriba la sala taba el desván, al que se xubía por una por una trampiel.la qu’ había nel techu d’ún de los cuartos. Al.lí guardábase la fueya pa los sargones ya pa las vacas, ya pouco más, porque yara mui pequeñu. Cuando s’arreglóu la cocina, desvanaron el pasiellu ya al.lí tenían tamién un pequeñu desván.
     Debaxo la sala ta la corte las vacas con puerta de cuarterón ya un ventanucu pa dar un poco de claridá. Al l.lau de la casa ta l’horriu, que foi traíu a principios del sieglu XX de la Casa’l Monte (El Teixidal), de la mesma parroquia. L’horriu, amás de ser l.lugar pa guardar la collecha hasta los años 40, yara ‘l cuartu de los invitaos, cuando venía dalgún familiar de fuora, dormía nel horriu. Tien un corredor, onde se guardan las cebollas ya se colgaban las riestres de maíz cuando se cultivaba. Debaxo ta la corte, onde s’asientan los cuatro pegol.los. Nesta corte guardábase’l burru ya los gochos en armoniosa convivencia. Nuna de las esquinas taba la picadera’l toxu. Hubo temporadas que tamién allí se guardaban los coneyos, anque estos tamién s’acomodaban na corte las vacas. Hacia 1945 féixose un cabanón pa guardar los carros ya outras ferramientas. Servía, amás pa guardar la yerba seca, mientres nun la metían nel payar ou nos varales. Pol branu, tamién se guardaba’l verde, pa que nun caleciera, porque nun se-ys podía dar caliente a las vacas, ya n’iviernu pa guardalo del temporal. Esti espaciu ya mui aprovecháu, al.lí tamién s’amontonaban las patacas cuando se sacaban, pa escoyelas, por tamaños; unas pa freír, outras pa cocer y del.las pa semiente, ya las más grandes pa consumir a última hora porque se conservaban meyor. Tamién pa vender si sobraban. Despuós, guardábanse nel horriu. Delantre la casa ta la corrada, onde se ponía’l montón del cuitu cuando se sacaba. Esti l.labor yara ún de los que se facían n’andecha, siempre se llamaba xente, familiares ou vecinos pa qu’ayudaran, solía facese pola tarde ya dábase-ys la merienda: tortía, chorizos, freixuelos ya miñuelos ou rabanadas, ya vinu. Na corrada asítiase’l l.leñeiru, unde s’amontona la l.leña y al.lí ta’l picadeiru, pa fendela. Ta feito del tureru del pie del carbayu qu’ha ser vieyu pa que tenga muitu ciernu que ya más duru. La corrada ya sitiu de pasu pa fincas de la casa. Debaxu la corrada ta la era, y el sitiu de los varales ya un l.lugar que-y l.laman “la casa vieya”. Paez ser que al.lí tuvo la vivienda primitiva, anantes d’esta.
La familia d’ El Peceiru construye una vivienda nueva nel añu 1965 y ya la que güei ta habitada. Ya una casa de dos plantas, na planta baxa ta la corte ya enriba la vivienda, más moderna que la descrita anantes, a la que s’acede por una escalera que da accesu a la casa ya a la azotea. Tien cuatru cuartos, un comedor, una cocina ya el cuartu de bañu. Al pie de casa construyóse un garaxe que tamién presta outros servicios pa guardar ferramientas y otros preseos ya pa facer ya curar l’ embutíu cuando se fai la matada. Apegáu a la cuadra ta l’estercoleru ya ‘l gallineru las pitas. Delantre la casa ta la corrada que tamién tien los mesmos espacios que la casa vieya.
La casa El Xastre, ta costruida al ras del camín que vei pa los Piñeiros. Ya de palnta cuadrada, nel desnivel que forma’l terrén ta la corte, xustamente debaxu de la planta-vivienda. La corte ta repartida en tres espacios, ún pa las vacas; ooutru pa cubil de los gochos, ya un espaciu más pequenu pa las uveas (cuando las había). La corte tien duas entradas con puerta de cuarterón, una por cada l.lau de la casa.
A la entrada la vivienda hai un espaciu cubiertu, l.lamau el portal y a continuación, na baxada a la corte ta la corrada. A la vera la casa, separaos pola corrada tán asitiaos l’horriu ya la panera. Debaxo l’horriu hai una corte onde guardaban el mular ya’l borricu y onde tamién tenían los coneyos. Ya debaxo la panera, un cabanón onde guardan la yerba.
Pola parte d’atrás de la vivienda ta la era, espaciu propiu como nas outras casas. Al l.lau de la era ta’l sitiu los varales, l.lugar que quedóu más reducíu cuando nos años 60-70 construyeron el payar.
Debaxo’l corredor de la vivienda ta’l cortín de las abeas, onde hbía abondos truébanos. Inda güei cudian del.las. Na vera’l cortín ta’l güertu las berzas, anque nos caberos años plantáronlu n’outru l.lugar tamién cercanu a la casa. Al.lí yérguense un naranxeiru ya un llimoneiru, una perguapa oliva ya una figal.
Lo que ya la vivienda tenía una entrada soyada de chouxa, que más tarde soyaron de terrazu. La cocina yara un l.lar grande col fornu dientru, hasta los años 50 que quitaron el l.lar pa poner una cocina moderna. Da claridá una galería. De la cocina pásase a un pasiellu unde hai un cuartu grande, agora más reducíu porque al.lí fixeron el cuartu bañu, Tamién da pasu a la sala, un espaciu grande pol que se pasa a dous cuartos. Na sala tamién había una cama, que según fueron menos en casa quitáronla. De la sala pásase al corredor que da al Sur y dende’l que se puen contemplar tolas fincas hasta’l ríu. Debaxu mesmo, ta asitiáu’l cortín.
     La Casa la Cruz, ta a la vera’l campu del mesmu nome, el Campu la Cruz, onde hai un cruce de caminos formáu pol camín que vei a Belén y el que vien de Las Tercenadas, el que vei a Los Piñeiros pasando por xunta ca El Peceiru y ca El Xastre. Nesta casa tamién hai dos viviendas, una la qu’habitaron hasta 1964, ya outra la nueva, d’estilu más modernu, ensin corte debaxu ya de dos plantas. La casa vieya, yara una vivienda típica asturiana, col corral delantre la casa. La cocina un pouco más baxa ya con un poco más altura la sala que facía de distribuidor pa los cuartos, como en casi tolas casas de por al.lí. Apagada a la casa l.levántase la corte las vacas ya enfrente l’horriu ya ‘l payar. La corrada, no mediu, ta rodeada por estas construcciones. Hacia 1960, construyeron un “aljibe” pa recoyer l’augua cuando chovía. En La Degol.lada hai augua corriente nas casas dende 1968 (fecha aproximada).
Xunta casa ta l´horriu de cuatro pegol.los ya a la vera asítiase’l payar. Na parte d’atrás de la casa la casa’l fornu, ya debaxo casa, el gal.lineru las pitas.
     La casa Pachín, ya más grande que las outras, de duas plantas, la primera ocupada pola corte las vacas ya la corte los gochos, con accesu por dientru, por una escalera de madera a la planta-vivienda, distribuida de la siguiente forma, una sala grande que sirve de distribuidor pa los cuartos ya da pasu a la galería, que primeiro foi corredor, ya de la que ta separada por un tabique. Dende la sala accedese a los cuatro cuartos, tamién espaciosos. Pal outru l.lau ya separáu por un pasiellu ta la cocina, outru cuartu ya una escalera de madera pola que se sube al desván. A la entrada ta’l cuartu bañu, antiguamente más rudimentariu (una tabla de madera con un furacu en mediu que se comunicaba con una esquina de la corte las vacas). Alredor de la casa ta’l corral, enforma grande, que da a tres de las fachadas de la casa. A la vera la casa ta la panera, con caramanchón debaxo, unde tendían la roupa ya guardaban patacas, maíz, mazanas, etc. Debaxo ‘l caramanchón ta la corte los gochos; a la vera un cabanón ya apegada a esti ta la casa’l fornu. Pola parte d’atrás de la casa ta’l pozu pal augua, únicu en La Degol.lada, las outras casas nun lo tenían, enantes de facer la traída hacia 1968, iban al augua a las fontes ya citadas. Esta casa disponía de dos entradas, una dende’l corral, que comunica con una de las de la corte ya outra con escaleras de cementu por outra de las fachadas. Cerca d’esta entrada asitiábase’l l.lavaderu. Tamién ya esti un espaciu del que nun disponían las outras casas. L’espaciu de ca Pachín ya más chanu, a esceición de los praos de regadíu que son más cuestos, como los de los otros vecinos. Pola parte de detrás de la panera ta la güerta; un pedazu pa árboles frutales, outru pal güertu las berzas ya outros pa distintos cultivos qu’al.lí dábanse muitu bien ya yara bon sitiu pa trabayalos porque ya terrén chanu. Cerca la casa tamién s’asitia’l payar, l.lugar unde dicen qu’antiguamente taba outra casa de las que s’acabaron en La Degol.lada. Fuera del corral ta la era, espaciu qu’amás de prestar el serviviu que se describe más alantre, yara l.lugar de reunión ya xuegos de los nenos del pueblu. Xugábamos al marru, al l.lobu ya la raposa, a la pita ciega, a la pedrequina, al escondite, a la pesca–pesca, a las cintas, a las palmas, etc. La casa Pachín al ser el terrén de los alredores más chanu que las outras prestábanos pa ir a xugar. El más pequenu de toos naquel.la dómina (Años 50-60), yara Tino ‘l Peceiro, al que los más grandes mandaban a roubar las naranxas al naranxal del Xaxtre, pa despuós comelas toos xuntos. Naquel entós yara l’unicu naranxal del pueblu.
     Nesta casa, como n’otras de la parroquia, actualmente dedícanse a la ganadería. Tienen una esplotación moderna: estabulación llibre con unas 35 vacas ya tolos adelantos no que se refier a maquinaria ya comodidades.
     En La Degol.lada, antiguamente había outras tres casas que s’acabaron hai más de cien años. Una era la de Manulón que según los vecinos, taba asitiada unde güei ta’l payar de ca Pachín; outra la de Borbón que taba asitiada no que güei ya la Campona´l Xastre, ya outra la de La Juana, asitiada no que güei se llama L’Hurtequín del Xastre.

 

FONTES CONSULTADAS:
Informantes: Esther López García, Ricardo García Pérez ya Joaquín García Pérez.
La mías vivencias na aldea de La Degol.lada, l.lugar unde nací ya paséi la mía infancia ya mocedá.
Bibliografía:
GARCÍA GARCÍA Ernesto, GARCÍA LÓPEZ, Mª Esther,(1999): La matada en La Degol.lada (Valdés). Cultures, nu 9. p.p.359-373. Uviéu. Academia de la Llingua Asturiana.
GARCÍA LÓPEZ, Mª Esther (1989): Rel.lumos folclóricos d’occidente. Lletres Asturianes. Uviéu. Academia dela Llingua Asturiana.
VILLALAÍN FERNÁNDEZ, José (1915). Topografía médica del Conceyu de Luarca. Madrid. Anales de la Real Academia de Medicina.
Padrón Municipal. Ayuntamientu de Valdés.
Llibru d’actas de matrimonios de la Parroquia de La Montaña de Rionegro (Valdés) 1897-2000.