Albergue
con la ayuda de: Consejería de Turismo y Cultura
 
Contador gratis

L'ESPACIU AGRARIU

Mª Esther García López

Las papas

Fanse con augua ya farina de maíz, torrada, anque, a veces fanse con farina l.lienta. Ponse l’augua a ferver ya cuando ruompe vei echándose la farina pouco a pouco, revolviendo pa que nun se faigan gorol.los. Hai que cocelas bien pa que tean a puntu, unos diez minutos. La farina tien que tar bien cocida. Tamién se fan de l.leite, sobre todo pa los nenos. Anantes, cuando los nenos yaran pequenos, facían-ys el cuechu, papas de farina blanca de trigu ya con azucre por enriba. Tanto las papas como el cuechu cuémense moyadas en l.leite.
La farina pa las papas tien que tar bien molida, sábese garrando un puñáu ya apretándola na mano. Tien que soltase fácil.
Outra variedá de las papas son las polientas. Colos mesmos ingredientes pero muitu más duras. Ponse l’augua a ferver, con sal ya cuando ruompe a ferver échanse tres mozadinas de farina, chantase’l cazu nel mediu ya déixase cocer un bon cachu hasta que tan feitas. Asina calientes van echándose a garfel.ladas pa los platos. Tienen que quedar bien duras, que nun s’efaragayen sinon ya que nun tán bien cocidas. Tamién se comían frías. En La Degol.lada, cuando iban al monte colas uveas, l.levaban las polientas pa comer. A las polientas poníase-ys p’acompangalas toucín frito mientres lo había, facíase-ys un furacu en mediu ya chenábase cola grasa que daba’l toucín al tostalo.
El gurupu. Faise col potaxe que sobra de la xanta. Si acasu échase-y un pouco más d’augua. Échase-y farina ya vei revolviéndose hasta que ta bien cocíu. Si nun queda potaxe, puede facese tamién con caldu falsu, unas patacas con una pouca d’untaza ya la farina

 

FONTES CONSULTADAS:
Informantes: Esther López García, Ricardo García Pérez ya Joaquín García Pérez.
La mías vivencias na aldea de La Degol.lada, l.lugar unde nací ya paséi la mía infancia ya mocedá.
Bibliografía:
GARCÍA GARCÍA Ernesto, GARCÍA LÓPEZ, Mª Esther,(1999): La matada en La Degol.lada (Valdés). Cultures, nu 9. p.p.359-373. Uviéu. Academia de la Llingua Asturiana.
GARCÍA LÓPEZ, Mª Esther (1989): Rel.lumos folclóricos d’occidente. Lletres Asturianes. Uviéu. Academia dela Llingua Asturiana.
VILLALAÍN FERNÁNDEZ, José (1915). Topografía médica del Conceyu de Luarca. Madrid. Anales de la Real Academia de Medicina.
Padrón Municipal. Ayuntamientu de Valdés.
Llibru d’actas de matrimonios de la Parroquia de La Montaña de Rionegro (Valdés) 1897-2000.