Albergue
con la ayuda de: Consejería de Turismo y Cultura
 
Contador gratis

L'ESPACIU AGRARIU

Mª Esther García López

Outros espacios alredor de la vivienda
La era.

     Fai llende cola corrada, col sitiu los varales ya cola casa vieya, unde se yergue un l.loureiru, ya n’outra esquina una figal na que s’enredaba una parra. Debaxo la era taba’l Pradín, plantáu d’abondos árboles frutales. Allí facíanse las mayadas de trigu, de centén, de fabas y d’arbeyos. Hasta más o menos los años 60 mayábase a capiellu, los homes golpiaban las espigas del capiel.lu contra unas l.lábanas apoyadas nun maderu de unos 4 a 6 metros, ya iba desgranándose todo. Cabían cuatro ou cinco mayadores. Lo que quedaba d’espigas que iban cayendo, mayábase colos manares. El granu recoyíase pa después molelo ya facer pan. Colos capiel.los facíase un varal de paya pa da-y al ganáu pol iviernu. El granu había qu’ abalialo, aprovechando días d’aire, pa quita-y la poxa. Las mayadas facíanse n’andecha. Ayudaban los familiares y/o los vecinos ya facíase francachena pa toos. Yara una de las fechas pa las que se guardaba l.lacón ya chorizos pa facer un bon potaxe ou cocíu. Pal día la mayada había escoyese un bon día de sol, porque lo primeiro que se facía yara pone el centén en cordones, entrenzáo, un capiel.lu pa cada l.lau pa que las espigas miraran todas al sol. Asina bien asoleyadas pa que desgranaran meyor. Una vez mayáu, col abaléu, un ramu grande d’abedul, iba pasándose pa quitar las espigas de delantre las l.labanas ou tondias, pa que quedara’l granu más l.limpiu. Pa barrer la era,despuós de mayar, utilizábase el mozu, un escobón feito con unos cuantos capiel.los xuntos, ataos, bien apretaos, recortábanse, quitábanse-ys las espigas, ya deixábase una mota por riba pa garralu cola mano. La era ya un espaciu propiedá de cada vecín, nun ya comunal.
Nos años sesenta entamó a facese esti l.labor cola mayadora, una máquina que compraron entre los cuatro vecinos ya dalgún más del pueblu vecín de Funtanavia. Güei nun se sema nin centén nin trigu ya las eras anque ocupan el sou l.lugar, tan más bien pa pación del ganáu, na casa que lo hai.

 

FONTES CONSULTADAS:
Informantes: Esther López García, Ricardo García Pérez ya Joaquín García Pérez.
La mías vivencias na aldea de La Degol.lada, l.lugar unde nací ya paséi la mía infancia ya mocedá.
Bibliografía:
GARCÍA GARCÍA Ernesto, GARCÍA LÓPEZ, Mª Esther,(1999): La matada en La Degol.lada (Valdés). Cultures, nu 9. p.p.359-373. Uviéu. Academia de la Llingua Asturiana.
GARCÍA LÓPEZ, Mª Esther (1989): Rel.lumos folclóricos d’occidente. Lletres Asturianes. Uviéu. Academia dela Llingua Asturiana.
VILLALAÍN FERNÁNDEZ, José (1915). Topografía médica del Conceyu de Luarca. Madrid. Anales de la Real Academia de Medicina.
Padrón Municipal. Ayuntamientu de Valdés.
Llibru d’actas de matrimonios de la Parroquia de La Montaña de Rionegro (Valdés) 1897-2000.