Albergue
con la ayuda de: Consejería de Turismo y Cultura
 
Contador gratis

L'ESPACIU AGRARIU

Mª Esther García López

El sitiu los varales

Un l.lugar xunta la era, achanáu ya sosteníu por una parede, pa poder asentalos bien. Facíanse dos ou tres varales. Lo primeiro yara chantar la l.lata, bien suxeta con unas estacas; despuós facíase la cama, con canas de castañal pa que’l varal nun percibiera la humedá del suelu ya por últimu entamábase ‘l llabor artísticu de facer el varal, yara l.labor d’homes ya non toos lo sabíen facer bien, en ca El Peceiru facíalu siempre Ricardo García axudaáu por Esther; lo importante yara que nun calara cuando chovía. De planta redonda, la base yara muitu más estensa p’acabar en picu. Necesitábanse dos personas polo menos, ún el que lo facía y outru´l qu’apurría ya iba mesando la yerba que sobraba alredor, pa que quedara bien redondu. Cubríase con paya de centén estendida, poniéndola bien curiosa, colas espiga contra la l.lata. Despuós iba entrellazándola con varas d’ablanu ya de salgueiru que fueran delgadas pa que doblasen bien. Ponía-y unas tres ou cuatru vueltas. Del varal iba mesándose la yerba durante tol iviernu ya pa cuando había dalguna vaca parida, ya que los primeiros días nun se-y podía dar verde, nin comida fría.
     Tamién se facía un varal de paya; como los de yerba, de planta redonda, iban colocándose los capiel.los cola espiga pa dientru, alredor de la l.lata; l.lueu cubríanse con capiel.los desfeitos, bien suxetos por un cordel feito con varas trenzadas por entre la cobertura. Esta paya tamién se-y daba al ganáu pol iviernu. Cuando se diba de filandón ya la nueite taba mui escura, al.lumábase’l camín con un capiel.lu de paya encesu. Pa el.lo dábanse-y la vuelta a las espigas y volvía atase pa facer que’l fou nun corriera tanto ya durara pa tol recorríu.
     Los varales yaran sitiu de xugar los neños, principalmente al escondite ya a cocinar, porque yara un sitiu cerca la casa y mui resguardáu del fríu.

 

FONTES CONSULTADAS:
Informantes: Esther López García, Ricardo García Pérez ya Joaquín García Pérez.
La mías vivencias na aldea de La Degol.lada, l.lugar unde nací ya paséi la mía infancia ya mocedá.
Bibliografía:
GARCÍA GARCÍA Ernesto, GARCÍA LÓPEZ, Mª Esther,(1999): La matada en La Degol.lada (Valdés). Cultures, nu 9. p.p.359-373. Uviéu. Academia de la Llingua Asturiana.
GARCÍA LÓPEZ, Mª Esther (1989): Rel.lumos folclóricos d’occidente. Lletres Asturianes. Uviéu. Academia dela Llingua Asturiana.
VILLALAÍN FERNÁNDEZ, José (1915). Topografía médica del Conceyu de Luarca. Madrid. Anales de la Real Academia de Medicina.
Padrón Municipal. Ayuntamientu de Valdés.
Llibru d’actas de matrimonios de la Parroquia de La Montaña de Rionegro (Valdés) 1897-2000.