Albergue
con la ayuda de: Consejería de Turismo y Cultura
 
Contador gratis

L'ESPACIU AGRARIU

Mª Esther García López

El güertu las berzas

Ya esti un espaciu que ta cerca la vivienda, porque tolos días se vei a buscar las berzas pal pote ya pa da-ys a los gochos. En tolas casas se planta’l güertu nel mes d’avientu. Diz un dichu: “Nel mes muertu planta’l güertu” (refierse a avientu, que ya cuando muerre l’añu).
A mediaos d’agostu fáise’l semilleru cola navina que se guarda d’un añu pa outru ya que se recueye de los berzones que se plantan nel güertu nuevu.
Amánsiase la tierra quitándo-y bien los tarrones ya l.labrase col aráu, ou cola xada, abónanse con cuitu ya güanu qu’había qu’echar pol riegu pero non enriba las berzas. A una distancia de mediu metru van poniéndose las berzas ya tápanse con outru riegu. Las berzas son cultivu importante pues son necesarias pa facer el potaxe, un alimentu básicu na aldea. Tamiésn se-ys dan a los gochos, a las pitas ya a los coneyos.
El güertu hai que plantalu cuando la l.luna ta en menguante, asina nun espigan las berzas. Esto tamién lo hai que mirar cuando se fai el semilleiru.
El güertu, plántase lo más cerca posible de la casa, pues veise a él tolos días, pa facer el potaxe ya pa da-yos a los gochos. Ya hai que tenelu bien atendíu. A veces chenábanse las berzas de ratas y chegaban a acabar con él.
Nos caberos años, xunta’l güertu de las berzas faíanse outros semaos: lechugas, zanahorias, ayos, ayos puerros, tomates, etc, ya tamién el cebolleiru, ésti mui importante porque, amás de coyer cebollas pal añu, tién se l’arreglu pa la matada pa la matada. 
Pa semar las cebollas l.labrábase primeiro la tierra, un mes anantes pa que tuviera descansada. Llueu plantábase’l cebollu, dous ou tres mazuños que se iban a mervar a L.luarca. Las cebollas había qu’atendelas bien, recuéyense n’agostu, ya enriéstranse con paya, pa colgalas nel horriu porque asina consérbanse meyor. La cebolla tamién tien el so poder curativu. Caundo daquién tenía un granu infestáu, ou cualquier outra infección, freíase un cascu de cebolla ya poníase bien caliente sobre la gafura pa que se rompiera ya saliera’l pus. Tamién cuando las vacas tenían tos, asábase-ys una cebolla ya dábase-ys unos días hasta que-ys pasaba. Nestos años, esta medicina foi perdiéndo puxu. 
Los árboles frutales
Las zreizales taban plantadas polas ouriel.las de los praos ya solía haber del.las pola vera casa. Hai zreizas de muitas clases: piconas, d’agrín mul.larinas, blancales ya negras.Tamién había nisales, abruneiros, perales ya manzaneiros, pescales, albaricoqueiros, guindales, naranxales ya llimoneiros, nozales, avellaneiros ya castañeiros. Tamién hai figales y dalguna parra. Las peras habíalas tamién de muitas clases, peras blancales, de manteca, de don Guindo, d’augua, de redondón, ya d’escanda. No monte hai abondos arándanos. Tolos años iban los neños a pañalos. Tamién moras ya fresas bravas. Las peras ya las mazanas poníanse a madurar entre yerba seca ou entre paya. Nos caberos años nun se cudian tanto los árboles frutales. Los qu’había polas ouriel.las fueron cortándose, pa que dieran más pación ya, dotramiente, la xente diose en comprar fruta na frutería y dáse-ys menos importancia. Asina cortáronse muitas zreizales, ya muitos de los outros frutales fueron morriendo. 
Nos años sesenta baxábase al mercáu de L.luarca a vender fruta, sobre too zreizas ya nisas. Cargábanse las banastras y l.levábanse nel mular. Era una axuda pa la economía de la casa

 

FONTES CONSULTADAS:
Informantes: Esther López García, Ricardo García Pérez ya Joaquín García Pérez.
La mías vivencias na aldea de La Degol.lada, l.lugar unde nací ya paséi la mía infancia ya mocedá.
Bibliografía:
GARCÍA GARCÍA Ernesto, GARCÍA LÓPEZ, Mª Esther,(1999): La matada en La Degol.lada (Valdés). Cultures, nu 9. p.p.359-373. Uviéu. Academia de la Llingua Asturiana.
GARCÍA LÓPEZ, Mª Esther (1989): Rel.lumos folclóricos d’occidente. Lletres Asturianes. Uviéu. Academia dela Llingua Asturiana.
VILLALAÍN FERNÁNDEZ, José (1915). Topografía médica del Conceyu de Luarca. Madrid. Anales de la Real Academia de Medicina.
Padrón Municipal. Ayuntamientu de Valdés.
Llibru d’actas de matrimonios de la Parroquia de La Montaña de Rionegro (Valdés) 1897-2000.