Albergue
con la ayuda de: Consejería de Turismo y Cultura
 
Contador gratis

L'ESPACIU AGRARIU

Mª Esther García López

Las patacas

Sémanse en tierra mansa ou en tierra brava. Las que se seman en mansu, prepárase la tierra como pa outras semientes ya abónanse con cuitu ya con guanu. Las que iban en brabu, primeiro había que pulgar el prau ya despuós preparalo, ya abonalo en condiciones. Güei, esta costume de semar en brabu foi desaniciándose.Las patacas siguen semándose en tolas casas, non siendo nas que namás hai vieyos que nun las pueden trabayar.
Primeiro l.levábase’l cuitu ya esparcíase en montones por tola tierra, cuitábase la tierra, esparciéndolo bien distribuío. Iban faciéndose riegos ya poníanse las patacas, más o menos a duas cuartas de distancia, este yara l.labor de las muyeres. Outu iba detrás metiendo el cuitu, ya outru echando el guanu. Tapábanse col siguiente riegu. Las vacas amenábanlas las muyeres ou los neños. El l.labor de l.labrar facíase primeiro col besadoiru ya años más tarde col aráu; yara tarea del amu la casa. Cuando los fíos iban medrando, había que ir enseñándo-ys a l.levar el besadoiru, l’aráu, la semadora, la grade, etc. 
Las patacas daban abondo trabayu. Cuando ya salía la planta, había que sal.lalas, riegu por riegu, ya planta por planta, p’arranca-ys las yerbas malas ya removéis la tierra, axuntándola alredor de cada planta. Cuando ya yaran más grandes ya la planta taba nieta, había que sulfatialas pa que nun-ys entrara l’escarabayu nin la mángara. 
La Degol.lada siempre foi sitiu de bona collecha de patacas, bonas ya que saben muitu bien. Nos años sesenta, semábanse pa vender; yara una axuda pa la economía de la casa.
Tanto la sementera como la recoyida de las patacas tamién se facía n’andecha. Iban los vecinos ya los familiares que vivían cerca. Dalguna de las muyeres quedábase en casa pa facer la merienda, tortía, l.lacón cocíu, freixuelos ou miñuelos, chorizos, vinu ya café. Anque agora cola maquinaria fanse los trabayos más rápido, esti vezu sigue manteniéndose.
Las muyeres tamién tenían el l.labor de cortar las patacas la víspera, siempre deixándo-ys un guíu. Cuando se sacaban amontonábanse debaxu’l cabanón ou n’outru l.lugar a cubiertu, ya iban pouco a pouco escoyéndose, por tamaños, pa semar, pa vender, etc. Esto iban faciéndolo las muyeres, ya cuando chovía ou facía mal tiempu, axudaban los homes. Las que se deixaban pal añu ya pa semar, amontonábanse nel horriu, por separáu. Cuando chegaba la primavera había qu’esguialas pa que se conserven meyor.
Agora los vecinos de La Degol.lada ya los de los outros pueblos de la parroquia que siguen semando patacas ya outros cultivos, fan estos l.labores con maquinaria; ya todo muitu menos trabayosu.
Todas las tierras de l.labor, tenían alredor una ouriel.la de prau, onde se l.lindaban las vacas pola cadena.. Las tierras taban separadas entres sí polos sucos, tierra amontonada, que taba de prau, unde tamién se pañaba la yerba, que se l.lebaba pa casa a rasos (una maniega empicada) ou a feixes (unas cuantas gaviel.las, puestas unas en cada sentíu ya amarradas con un cordel). Los arrasos l.levábanse nel l.lombu ya apoyaos na cabeza, aguantaos colas manos. Los feixes l.levábanse enriba la espalda.
Tolos años el día San Marcos bendecíanse las tierras pa que dieran bona collecha. L.levábase un ramu de l.loureiru ou de oliva, del que se tenía benditu del Día Ramos; un poucu d’augua bendita, recoyida el día Sábadu Santu cuando’l Cura fai la bendición de l’augua ya del fou, ya dicíase la siguiente oración, moyando’l ramu y faciendo una cruz nel aire pa esparcir l’augua ya chantábase un ramu nuna esquina de cada tierra:

Afu ora sapos ya ratos
ya toda la comisión
qu’aquí vos traigo l’augua bendita
ya’l ramu de la Pasión.


Los nenos de la casa yaran los encargaos de dir bendecir las tierras.

 

FONTES CONSULTADAS:
Informantes: Esther López García, Ricardo García Pérez ya Joaquín García Pérez.
La mías vivencias na aldea de La Degol.lada, l.lugar unde nací ya paséi la mía infancia ya mocedá.
Bibliografía:
GARCÍA GARCÍA Ernesto, GARCÍA LÓPEZ, Mª Esther,(1999): La matada en La Degol.lada (Valdés). Cultures, nu 9. p.p.359-373. Uviéu. Academia de la Llingua Asturiana.
GARCÍA LÓPEZ, Mª Esther (1989): Rel.lumos folclóricos d’occidente. Lletres Asturianes. Uviéu. Academia dela Llingua Asturiana.
VILLALAÍN FERNÁNDEZ, José (1915). Topografía médica del Conceyu de Luarca. Madrid. Anales de la Real Academia de Medicina.
Padrón Municipal. Ayuntamientu de Valdés.
Llibru d’actas de matrimonios de la Parroquia de La Montaña de Rionegro (Valdés) 1897-2000.