Albergue
con la ayuda de: Consejería de Turismo y Cultura
 
Contador gratis

PARROQUIA DE LA MONTAÑA

Mª Esther García López

toponimia (página 1 - 2 - 3 - 4 - 5 - 6 - 7 )

D’Arriba’l L.lugar: Monte con pinos y dalgún prau, asitiáu na parte d’arriba’l pueblu, agora pa silu y pastu. Zreizal.
Debaxu Casa: 1. Finques debaxo la casa vieya de Ca’l Peceiru, que pertenecen a esta casa. Primero fueron tierres de llabor y agora tán de prau. La parte d’abaxo llámase El Ribón y taba d’árboles de fruta: nisales, pavíes, perales, pescales y manzanales. Fan llende con El Prau Nuevu. La Degol.lada. 2. Tierra perteneciente a Ca Barcelón. El Val.lantsu.
Debaxu la Caleyya (~ Debaxu la Caleya): Prau solanu, na marxe drecha d’El Ríu Negru. Pertenez a Ca Barcelón. N’El Val.lantsu.
Debaxu’l Zarru: Monte avisíu plantáu de bidules, pinos y dalgún ocalitu.
Debaxulacorte: Prau en Busecu asitiáu pa la parte de baxo de Ca’l Pachu.
Deforcu, El: Monte raso y lleirón, a la vera La Plana, de La L.lera hacia Busecu. Busecu.
Degol.lada, La: Pueblu de la parroquia, asitiáu ente los montes de Las Cruces, y Capiel.lamartín y les sierres de Las Tercenadas y La Degol.lada, nun terrén que forma un pequeñu cuetu. Tien una parte llana y llueu ye más cuestu hasta’l ríu. N’El Campu la Cruz crúcense los caminos que van pa la ilesia de Belén y el camín que va pa Las Tercenadas. D’allí sal otru camín pal avisíu ya otru pa la sierra.
Detachu la Pinona, El (~ El Detayyu la Pinona): Pasadizu entre dos peñes, más p’arriba Los Penedinos. Busecu.
Detrás de l’Acebeiral: Monte plantáu de pinos en las Tercenadas.
Detrás del Cortín: Monte solanu, con dalgún árbol y maleza detrás d’un tesu. Ellí nesi llugar, según los informantes, «víase, de xemes en cuandu, arder un fueu dende casa ya cuandu chegaban al sitiu nun quemara nada nin tampoucu había señas de qu’hubiera fueu. Al.lí apaecíase un caballu blancu que yara’l demoniu. Pasaba trotando ya despuéis desapaecía. Ya un pínfanu que si te sales del camín baxas hasta’l ríu». El Mazu.
Detrás del L.loureiru: Llugar en La Degol.lada onde taba asitiada la primera casa vieya de Ca’l Peceiru.
Diestros, Los: Tierres y praos en Godón.
Diestru, El: Tierra que se sema de fabes y tamién prau en San Playu de Sesmu.
Duernu, El: Praos que pertenecen a Ca’l Campu y a Ca Maruxa. Ente El Pradón de Ca la Perdiz y de Ca Xuanzái. Siñeiriz.
Eiril.lín, L’: Prau en Las Tercenadas.
Eiriquinos, Los: Llugar onde posaben los entierros. Pertenez a El Solanu.
Eirón, L’: 1. Tierra de llabor nel centru’l pueblu. Caxóus. 2. Tierra ya prau de Ca’l Texedor onde se semaba maíz, pataca, centén... Agora ye prau. Fontanavia. 3. Tierra onde se semaba maíz y maizones. Agora ta de prau. Riupinosu. 4. Tierra onde se sema maíz y pataca, en terrén más bien llano en La Carboniel.la. 5. Tierra asitiada xunto a otra llamada L’Ablanal. Pertenez a Ca L.lera y a Ca Xupe. Concernosu. 6. Prau en San Playu de Sesmu pa secu y pa ensilar. Enantes yera tierra
Eirones, Los: Praos, agora plantaos d’ocalitos. Estrémense en Los Eirones d’Arriba ya Los Eirosnes de Baxu. Fontanavia.
Eiros d’Encima, Los: Praos de secanu de varios vecinos. Zreizal.
Eiros Grandes, Los: Tierres de llabor onde se sema de too, de varios vecinos. Agora sémense de fabes y de maíz. Paladeperre.
Eiru d’Arriba,L’: Tierra de a Ca’l Xastre, asitiada cerca La Fonte’l Regueiru, penriba El Camín de la Iglesia y faciendo llende con un camín de serviciu pa les finques d’El Requeixu. En La Degol.lada.
Eiru L.longu, L’: Mitá tierra y mitá prau. Caxóus.
Eiru la Fonte, L’: Tierra de llabor nel centru’l pueblu onde se sema de too. Caxóus.
Eiru la Roza, L’: 1. Enantes yera tierra de semaos, agora ta de prau. Riupinosu. 2. Prau en las Tercenadas.
Eiru los Bruneiros, L’: Prau solanu asitiáu en La Vil.la de Baxu en Las Tercenadas.
Eiru los L.loureiros, L’: Prau solanu asitiáu en LaVil.la de Baxu en Las Tercenadas.
Eiru’l Couz L’: Tierra perteneciente de Ca Xuanzái, agora fecha prau. Siñeiriz.
Eiruencima, L’: Eiru en Menudeiru pa la parte d’arriba del pueblu, a la vera La Piedra Blanca.
Eirulafonte: Prau, enantes tierra de llabor. Los Conqueiros.
Empedriáu, L’: 1. Llugar cuestu y de piedras en Las Tercenadas.
En Siñeiriz, monte con peñascos asitiáu cerca El Sagredal.
Encima Ca la Cuosta: Prau de la casa del mesmu nome. Menudeiru.
Encima Casa: Praos pela parte d’arriba de la carretera. La Carboniel.la.
Encima la Veirina: Prau solanu en las Tercenadas.
Encima las Rozonas: Zona de monte dividío en suertes en Las Tercenadas.
Ente las Cortes del Roxu: Prau que tenía tres cortes, una pa les vaques y les otres dos pa yerba, debaxo Ca’l Xuliu.
Entre los Peneos: Llugar de xunta en Las Tercenadas, onde faeb conceyu los vecinos pa tomar alcuerdos o pa pasar el tiempu.
Entremeces, Los: Camín en Busecu.
Era, La: Nome xenéricu pa denomar los llugares onde se facía la mayada. Tán asitiaes xunto a la casa, son llanes y si nun lo yera’l terrén, iguábase con parede p’allanalu. Hai en cada casa de La Degol.lada, de Fontanavia, de Paladeperre y práuticamente de cada pueblu de la parroquia.
Eras del Chanu, Las: Era comunal en Los Piñeiros, onde mayaben varios vecinos.
Ermita, La: Praos cerca La Capilla de la Blanca. Son de varios vecinos. Siñeiriz.
Ermitas, Las: Praos solanos en San Playu de Sesmu, asitiaos pa xunto a los caminos d’El Pilón, pa la parte drecha. Nestos praos hai una lleenda que diz qu’ellí apaeció San Playu, nun llugar que siempre ta húmedu.
Escampleada, La: Llombu xunto al avisíu, terrén avisío ello tamién, enriba de La L.louxera y El L.louxón, plantáu de pinos ya ocalitos. Siñeiriz.
Escuola las Nenas, La: Escuela fecha en terrén d’El Rebol.lar, asitiada a la vera la carretera de L.luarca a Villayón, a l’altura del kilómetru 17. Belén.
Escuola los Piñeiros, La: Escuela fecha onde taba Ca Catuxu, nel añu 1910. «La l.louxa sacáronla d’El Val.le Grande ya acarrétaronla los nenos». Zarróse cuando se fixo la concentración escolar, hacia l’añu 1969-70. Los Piñeiros.
Escuola Vieya, La: Edificiu asitiáu en Belén xunto a la retoral vieya; foi la primer escuela qu’hubo en Belén y perteneció a la familia de los Jardones. Posiblemente del sieglu xix.
Escuola, La: Edificiu onde se ponía escuela hasta que se concentraron los alumnos en L.luarca. Ta asitiada pal picu’l pueblu, cerca de Ca Senciu y de Ca Frasquillu. Busecu.
Escuolas Nuovas, Las: Otru edificiu escolar en terrén de Los Jardones, que se fixo en 1964. Belén.
Esperón, L’: Prau y monte con pinos y árboles de ribera. En la Carboniel.la.
Espín, L’: Casa onde tuvo asitiada una de les tabernes del pueblu durante munchos años, hasta los setenta, ya rexentada por Consuelu ya Mingón. Belén.
Esquiloiru, L’: Prau xunto a Ca Lin del Solanu que fai llende con La Reguera. Los Rebol.lares.
Esquión, L’: 1. Prau asitiáu no mediu la sienra. Caxóus 2. Monte raso. Asitiáu pa baxo d’El Campu l’Árguma p’hacia la drecha. Riusecu.
Esquitón, L’: Prau qu’agora ta de monte, a la vera El Ríu Caxóus.
Esquiyyón, L’ (~ L’Esquiyón): Monte que forma un tesu, plantáu de pinos. El Val.lantsu.
Estaxón, L’: Prau de secanu onde se meten les xates a pastiar. Los Conqueiros.
Estibada, La: Parte baxa de la sierra, mesmamente un poco más arriba de Ca Pachín, que se dedicaba pa rozar ganza. Pertenez a Ca’l Texedor de Fontanavia. La Degol.lada,
Estibadina, La: Enantes yera prau qu’agora foise a monte. Hai una fonte nel mediu del mesmu nome, que nun seca y tien agua mui bono. Caxóus.
Estrechina, La: Camín que va dende Ca’l Peceiru hasta la carretera. Divide El Chanón y El Chanín de Pachín, onde enllaza con El Camín de la Iglesia que pasa per xunto a Ca’l Peceiru y per xunto a Ca’l Xastre. La Degol.lada.
Estrechona, La: Camín en Fontanavia que lleva dende Ca’l Texedor hasta Ca’l Viñu. Güei ta cubiertu pola pista.
Fabariegas, Las: Prau qu’enantes foi tierra. Dicen que’l nome vien de la producción de centén y trigu, que se medía en fariegas o fanegas, midida que nun llega a 17 ochaves. Zreizal.
Facu, El: Prau de secanu, pa segar. Enantes foi tierra. Los Conqueiros.
Faeu, El: 1. Monte asitiáu pa la drecha de Los Carrascales. La Degol.lada 2. Monte que pertenez a varios vecinos. Siñeiriz.
Falcas, Las: Monte d’arboláu: carbayos, bidules... Las Tercenadas.
Fana, La: 1. L.lugar onde se rozaba ganza, pal llau del avisíu, más p’arriba de La Castañal. La Degol.lada. 2. En Monte mui pendiente, con varies peñes y fontes: La Pena los Xatos, El Penón de la Fana, La Fonte la Fana, La Fonte’l L.lobu, El Carcavín... Riupinosu.
Faxera d’Andrés, La: Prau de Ca Andrés en Las Tercenadas.
Faya, La: 1. Camín per onde va agora la carretera que lleva de Busecu a Belén. 2. Dos praos que tienen fonte d’arriba La Fonte las L.lamas. En Busecu.
Fayas, Las: Parte del monte nel avisíu. Ye monte raso onde tienen suertes tolos vecinos y tamién dalgún prau. Ta cerca de La Casablanca y hai una corte pa meter el ganáu. Siñeiriz.
Fayona, La: 1. Prau de secanu, pa segar y pa pastiar. Los Conqueiros. 2. Campa asitiada xunto a la güerta. Enantes yeren tierres, agora ta pa pación. El Mazu. 3. Monte con un llerón, el de L.lera Gruosa. Riupinosu. 4. Prau en Busecu. 5. Un camín qu’empieza na vuelta de La Corripiel.la que va dar a La Degol.lada y sigue pa Los Conqueiros.
Fenosas, Las: 1. Finques, tierres y praos, en terrén ente llano y cuesto, pa lo solano. El Mazu. 2. Finques que tán asitiaes p’hacia Ca’l Mazu. Pertenecen a Ca Bernaldón. Los Piñeiros.
Ferreirona, La: 1. Prau de secanu que foi tierra. Los Conqueiros. 2. Regueiru que naz en La Fonte Fanchu y desemboca n’El Ríu Pequenu. Los Conqueiros.
Fervedoiru, El: 1. Pozu n’El Ríu Negru, bastante fondu. Cai l’agua nuna firvia. La L.linera. 2. Monte plantáu de pinos en Las Tercenadas.
Fervedores, Los (~ Los Arvidones): Terrenos más p’acá de La Pousa, de Casa Fanchu y enfrente El Rondiel.lu. Busecu.
Figal, La: Monte primeramente plantáu de pinos y agora amansiáu pa prau. Ta cerca Ca la Figal, qu’agora ta vacía. La Ordovaga.
Finca de Vitoria, La: Terrén onde hai una corte y les ruines d’una casa que s’acabó hai munchos años. Vivió munchu tiempu nella una muyer sola. Riupinosu.
Fincas de Buonu, Las: Praos de secanu. Riupinosu.
Flurida, La: Monte y un cachu de prau de secanu, pa pastiar. Ehí hubo una casa antiguamente que s’acabó fai munchos años y de la que queden namái les paredes. Hai tamién una vuelta nel camín que se llama asina. Los Conqueiros.
Focarona, La: Llugar en Godón onde naz El Regueiru Val.lina d’Alda.
Folgueirosa Cemera, La: Monte raso p’allá de Ca’l Meleiru. Busecu.
Folgueirosa, La: 1. Monte raso y con llastrales. Riupinosu.2. Tierra en Concernosu, de Ca’l Siel.lu.
Fondeiru, El: Prau de Ca Perra que llega hasta Ca Parrondu. En Busecu.
Fondu la Bouza, El: Prau xunto a El Ríu’l Zurdu que pertenez a Ca’l Peceiru. Ye la parte de La Bouza que fai llende col ríu. La Degol.lada.
Fondusoucasa, El: Unos praos solanos ya mui cuestos, de Ca’l Tendeiru. Concernosu.
Fontanavia (~ Funtanavia): Pueblu de la parroquia, en llende con La Degol.lada, El Solanu, Busecu y Los Piñeiros.
Fontanica, La: 1. Fonte que secaba d’iviernu, agora práuticamente seca. Formábase una poza onde había munches xaronques (güevos ya cuyarines). Allí diba buscase l’augua pa los gochos y tamién diben a beber les vaques y los burros, a na poza que se formaba. Ta n’El Camín de la Iglesia, ente Las Fontanicas de Ca’l Xastre y La Chana de Ca’l Peceiru. La Degol.lada 2. Fonte n’El Regueirón, en Las Tercenadas. 3. Fonte asitiada nel prau La Herencia, que namás tien agua d’iviernu. Pertenez a Ca’l Tendeiru. Concernosu.
Fontanicas, Las: 1. Finques debaxo’l camín que pertenecen a Ca’l Xastre. Agora tán de prau y pácenles les vaques de Ca Pachín. No camín ta la fonte de La Fontanica. La Degol.lada. 2. Fonte asitiada no monte Las Penas, en Riusecu. 3. Praos asitiaos en La Sienra, debaxo de La L.longa, en San Playu de Sesmu.
Fontanicu, El: Fonte de pocu caudal que ta a la vera Ca’l Xastre. Namás cuerre n’iviernu, cuando hai llena y nos caberos años cuasi nun tien augua. La Degol.lada. 2. Fonte nel prau d’El Requeixu, onde se diba n’años de muncha seca a buscar l’augua pa casa ya llevábase’l ganáu a beber al ríu. La Degol.lada.
Fontaniegu, El: Monte d’árboles del país en Las Tercenadas.
Fontanín, El. Fonte de mal tiempu y monte raso. Riupinosu.
Fontaninos, Los: 1. Monte solanu. Concernosu. 2. Fonte del mesmu monte. Concernosu.
Fonte Cemera, La: 1. Fonte nel mediu d’El Monte Los Adraos. Riupinosu. 2. Fonte asitiada nel picu’l pueblu, d’arriba de Ca’l Bedulu. Busecu.
Fonte d’Arriba, La: Fonte en Los Conqueiros d’u se trai l’agua pa Ca Pachón. Tien bebederu.
Fonte d’Órganu, La: Fonte camín de Paladeperre, asitiada nunes peñes. Tien agua tol añu. Riupinosu.
Fonte de Baxu, La: Fonte xunto a Ca’l Coxu, metida no valle de La Ordovaga. 2. Fonte en camín de la ilesia que lleva dende El Mazu hasta Belén. Tien mui bona agua y mui fresco, tol añu.
Fonte de Ca la Perdiz, La: Fonte en Siñeiriz que naz p’hacia El Carcavón. D’ella tráise l’agua pa la casa del mesmu nome.
Fonte de Cárcava, La: Fonte con augua caliente d’iviernu ya de branu frío. Ta asitiada n’El Pradón de Casa Cárcava. Concernosu.
Fonte de Chanoncima, La: Fonte na zona del mesmu nome, nel monte, en Las Tercenadas.
Fonte de don Pedru, La: Fonte en La Carboniel.la
Fonte de Menudeiru, La: Fonte en Menudeiru, asitiada na carretera. Tien un llavaderu y un bebederu pa les vaques.
Fonte de Rondu, La: Fonte d’au se trai l’agua pa una de les cases del pueblu. En Godón.
Fonte de Tras de Casa, La: Fonte d’au se saca la traída pa Ca Balón. Los Conqueiros.
Fonte del Parandal, La: Fonte asitiada na finca del mesmu nome en Las Tercenadas.
Fonte del Ribón, La: Fonte asitiada no prau del mesmu nome en La Carboniel.la.
Fonte Fanal, La: Monte, regueiru y fonte qu’a veces seca pel branu cerca de Penarronda. Riupinosu.
Fonte Fanchu, La: Fonte no pueblu de Los Conqueiros, onde traíen l’augua pa les cases, cuando nun había traída. Tenía llavaderu fechu con unes piedres y d’iviernu daba l’agua más caliente que les otres fontes.
Fonte Fondera, La: Fonte no fondu’l monte Los Adraos. Riupinosu.
Fonte Fría: 1. Fonte asitiada en camín que vei hasta Los Chanones. Ye una fonte d’augua mui frío de branu ya d’iviernu más caliente. Enantes había una llaguna bien grande qu’agora ta seca. Nesta fonte, según la lleenda, dicen qu’hai una encanta que guarda un tesoru: unes cuantes boles d’oru. Tamién se-y da esti nome al llugar onde ta asitiada la fonte. La Degol.lada 2. Fonte a la vera El Regueiru La Palomba. D’esta fonte traxeron la primera traída d’agua pal pueblu de Zreizal.
Fonte L.lope Díaz, La: Fonte xunto al ríu na finca La Capiel.la. Dicen que se llama asina porque vieno ún de Los Piñeiros, de Casa Xuan L.lope, a casar pa La Casa Baxu. Fueron los primeros que vivieron nesta casa qu’enantes foi rectoral, cuando la ilesia taba nos terrenos de San Salvador. Los Rebol.lares.
Fonte l’Arena, La: Fonte en La Baradoira, pa Capiel.lamartín. Busecu
Fonte l’Árguma, La: Fonte d’iviernu asitiada nun prau del monte L’Árguma. San Playu de Sesmu.
Fonte l’Avisíu, La: Fonte n’El Prau l’Avisíu, de Ca’l Texedor de Fontanavia. Tien depósitu, bebederu y llavaderu. D’agua mui frío ya nun seca no branu. La Degol.lada.
Fonte l’Avispera, La: Fonte d’allá de Ca’l Maruxu. Yera una ul.lera onde enfriaba la nata ya la manteca. En Riupinosu.
Fonte la Bidulina, La: Fonte asitiada xunto a una bidul grande que paez tener nunchu tiempu. Concernosu.
Fonte la Braña: Fonte n’Arnizu, nel prau del mesmu nome. Nesta fonte yera onde se llavaba la tripa pela matada los gochos.
Fonte la Carboniel.la, La: Fonte pública nel mediu’l pueblu. La Carboniel.la.
Fonte la Carril, La: Fontina que secaba d’iviernu y que se formaba una poza onde se diba buscar l’augua pa los gochos. Regaba daqué’l prau de Los Payarones. A la vera la fonte pasa la carril que da serviciu a les finques del alredor. La Degol.lada.
Fonte la Clica, La: Fonte na carretera, en terrenos de El Rebol.lar. Dicen que se llama asina porque se paraben les muyeres a mexar, enantes de chegar a Belén. En branu siempre ta seca.
Fonte la Culuobra, La: Fonte que nun seca y d’u se saca traída pa una casa del pueblu. Arnizu.
Fonte la Fana, La: Fonte asitiada nel monte del mesmu nome, con agua tol añu. Riupinosu.
Fonte la Gal.la, La: Fonte onde hai una ul.lera, que taba en terrenos de Ca’l Xuliu y qu’usaben tres vecinos. Ta n’El Prau la Fonte. En Riupinosu.
Fonte la Garfiel.la, La: Fonte entre La Degol.lada y las Tercenadas, no camín que vei pel altu la sierra hasta L.luarca y asitiada más p’abaxo del nacimientu del ríu. D’esta fonte traise l’agua pal pueblu.
Fonte la L.lameirona, La: Fonte en Zreizal. Naz cerca del ríu Caxóus, en terrén arcilloso, y ta nel monte del mesmu nome. Agora sal un poco más abaxo.
Fonte la L.lamosa, La: Fonte asitiada casi no mesmu picu’l monte del mesmu nome, dividíu en suertes. Concernosu.
Fonte la L.lastra, La: Fonte que naz en peña y llastra. Ta más p’arriba de La Fonte la Candanosina. Busecu.
Fonte la L.lera, La: Fonte a la drecha de Penarronda y d’El Cabu La Calea. Riupinosu.
Fonte la L.lomba, La: Fonte en Busecu.
Fonte la L.louxera, La: Fonte y regueirín que da l’agua al llugar d’El Barriu. Siñeiriz.
Fonte la Mouriel.la, La: Fonte asitiada tres d’El Picu la Reguera que vierte agües p’hacia Oneta. Agora seca pel branu. Siñeiriz.
Fonte la Movidina, La: Fonte asitiada n’El Zarru’l Pan de Ca Manulón. Con pozu, n’El Camín de Riunegru, onde bebíen les vaques cuando diben pal monte L’Árguma. Riusecu.
Fonte la Ortiga Escura, La: Fonte que ta nel prau del mesmu nome, en Las Tercenadas.
Fonte la Pila, La: 1. Fonte no prau del mesmu nome que pertenez a Las Tercenadas. 2. Prau solanu, de regadíu, fontanosu, con varies fontes, asitiáu en Las Tercenadas.
Fonte la Pinitina, La: Fonte cerca d’una peña pequeña, en monte del mesmu nome, pa la marxe drecha. Concernosu.
Fonte la Plana, La: Fonte na sierra del mesmu nome. En Concernosu.
Fonte la Pruída, La: Fonte no camín que lleva al picu El Sagredal. Agora ta seca, pero daba augua a El Regueiru’l Val.le.
Fonte la Regueirina: 1. Fonte que na n’El Zarru los Pinos. Zreizal. 2. Fonte y regueru que vierte n’El Ríu Pequenu. El Teixidal de Baxu. 3. Praos del mesmu nome de Ca Miguel. El Teixidal de Baxu.
Fonte la Reguera, La: Fonte en Fontanavia, asitiada a la vera’l prau del mesmu nome.
Fonte la Rezcayeira: Fonte en Fontanavia, na curva enfrente Ca Carmelona. Seca pel branu.
Fonte la Rucia: Fonte en camín que va a Fontes, Bul.lacente y Navelgas. Busecu.
Fonte las Agustinas, La: Fonte que ta asitiada na parte d’arriba de la capilla de San Playu de Sesmu, cerca El Camín de Las Traviesas y de las Rozas.
Fonte las Corradas, La: Fonte que namás cuerre d’iviernu, mesmamente xunto a la sierra Las Corradas. Concernosu.
Fonte las Cuatru, La: Fonte que cuerre no monte del mesmu nome, del otru llau d’El Ríu Pequenu, pa la marxe drecha. Menudeiru.
Fonte las Guórgolas: Llugar onde críen les xaroquen, con agua siempre, asitiáu en La Veigona. La Carboniel.la.
Fonte las L.lamas, La: Fonte a la entrada’l pueblu, con pilón pa beber el ganáu. Recude pa un prau y tien agua tol añu. Busecu.
Fonte las Rozas, La: 1. Fonte que pertenez a Ca Bernaldón, con augua tol añu. Los Piñeiros. 2. Prau del mesmu nome, de secanu y abondu cuestu. Antiguamente, onde se cavaba toxu pa los burros llamábase «la roza». Los Piñeiros.
Fonte los Ganzones, La: Fonte d’iviernu, asitiada n’El Monte los Ganzones. Caxóus.
Fonte los L.lamacinos, La: Fonte nel monte del mesmu nome en Riupinosu.
Fonte los Mouros, La: Fonte en La Gamayosa, d’arriba, pa la parte El Requeixu. Ye de munchu caudal y d’ellí fíxose nos años 70 una traída d’augua pa les cuatro cases de La Degol.lada.
Fonte los Umeiros, La: Fonte enriba de Coulabraña, con agua tol añu. Riupinosu.
Fonte Negra, La: Fonte nel monte La Cárcava Negra. Riupinosu.
Fonte Pernales, La: Fonte asitiada na finca del mesmu nome en San Playu de Sesmu. D’ella aprovechen l’agua pa la traída pal pueblu. Naz en Ca’l Carrizu y el depósitu ta en Ca’l Campu.
Fonte Picu, La: Fonte qu’agora ta seca. Busecu.
Fonte Teresa, La: Fonte no prau El Pulido, en Los Rebol.lares.
Fonte Verde, La: Fonte debaxo El L.lagu, na llende con La Candanosa. Riupinosu.
Fonte Vitoria, La: Fonte que yera de Casa Vitoria. Riupinosu.
Fonte, La: 1. Prau regadíu que fai llende cola carretera, cerca de la fonte pública de la que toma les agües. Zreizal. 2. Fonte con llavaderu y bebederos pal ganáu, que da agua al pueblu. Nun seca en tol añu, anque agora perdió agua pola mor de les plantaciones d’ocalitos y fuletos. Paladeperre. 3. Fonte pública de Zreizal reconstruida nel añu 1951. Tien llavaderu y bebederu. Enantes yera un pozu con llavaderos de piedra.
Fonte’l Beneitu, La: Fonte onde agora tienen la traída d’agua pa Ca’l Florentu. El Val.lantsu.
Fonte’l Borriquín, La: Fonte más bien d’iviernu, cerca El Picu’l Cordel. Arnizu.
Fonte’l Buscón, La: Fontanina de pocu caudal que naz nel camín de debaxo’l prau de Ca Fanchón. Aprovechen l’agua en Ca Lola. Siñeiriz.
Fonte’l Cadaval, La: Fonte que forma un regueiru que vierte augua a L’Azureiru, cerca de Ca l’Ucéu. Tien bebederu. Siñeiriz.
Fonte’l Campu, La: Fonte debaxo’l camín que lleva a Ca’l Xuliu. Busecu.
Fonte’l Carcavón, La: Fonte en prau del mesmu nome. D’ella traise l’agua pa Ca Gancéu. Ye una fonte que forma como un regueiru. Siñeiriz.
Fonte’l Cernáu, La: Fonte a la vera la carretera, xusto onde ta l’indicador de Siñeiriz. Fonte pública, agora tapóla una fana.
Fonte’l Chicu, La: Fonte xunto a Ca’l Chicu, nel camín públicu. La Carboniel.la.
Fonte’l Curiscu, La: Fonte en Picuverde, no monte del mesmu nome. Ye onde naz El Regueiru de las Pasadas.
Fonte’l Gal.lu, La: Monte pa rozar y plantáu de pinos en San Playu de Sesmu. Subiendo de Setienes, apegáu a Las Cogollas.
Fonte’l Gavilán, La: Fonte na sierra que pertenez a La Degol.lada. Ta en La Gamayosa d’Arriba, onde naz un regueiru que baxa a La Fana y a La Reguera los Umeiros y desemboca n’El Ríu Pequenu.
Fonte’l L.lagu, La: Fonte regueiru y praos que pertenecen a Ca Xuacu. N’El Teixidal de Baxo.
Fonte’l L.lamón, La (~ La Fonte’l Chamón): Fonte nel llugar, en monte del mesmu nome. Allí tamién hai un regatu. Pertenez a Casa Cárcava. Concernosu.
Fonte’l L.lindión, La (~ La Fonte Santa): Fonte nel prau de La Vil.la de Baxo. Tien agua frío de branu y más caliente d’iviernu. Agora llámen-y La Fonte Santa. Las Tercenadas.
Fonte’l L.lobu, La: Fonte en Riupinosu.
Fonte’l Marutu, La: Fonte asitiada pa la parte d’abaxo de la carretera, nel llugar del mesmu nome. Tien agua tol añu. Belén.
Fonte’l Montegrande, La: Fonte nel prau, agora nel monte del mesmu nome, ente El Monte Grande y La Veiga’l L.lombu. Menudeiru.
Fonte’l Penéu la Fonte, La: Fonte con bebederu, a la entrada’l pueblu. Delantre tien una esplanada pequeña y allí faise’l baille’l día la fiesta de «La Blanca», que se celebra’l día 8 de setiembre. Siñeiriz.
Fonte’l Penón, La: Fonte en camín de La Pasada. Los Piñeiros.
Fonte’l Picu, La: Fonte en Busecu, en monte del mesmu nome. Seca pel branu.
Fonte’l Pontigu: Fonte enriba’l prau El Pontigu. Nun seca en tol añu. Riupinosu.
Fonte’l Puchu, La: Fonte n’El Val.lantsu, nel monte llamáu Tronquéu, y pertenez a Ca Barcelón. Da agua colorao porque per ellí hai un filón de fierru.
Fonte’l Pumar, La: Fonte asitiada n’El Val.le’l L.lavayyu. El Mazu.
Fonte’l Rebol.lu, La: Monte raso y de mal terrén. Cuando llueve hai una fonte de mal tiempu. Ellí naz El Ríu Riupinosu. Riupinosu.
Fonte’l Rebul.losín: Fonte fecha con un pozu y una piedra encima. Dempués de la de La Movidina, nel monte L’Árguma, na pista que conduz a Riunegru. Riusecu.
Fonte’l Regueiru, La (~ La Fonte la Barrera): Fonte asitiada a la vera El Camín de la Iglesia. Tenía depósitu y dos bebederos pal ganáu, güei sepultaos por una fana. Esta fonte ye’l marcu d’una lleenda d’una encanta que vive pelos alredores de la fonte. Dicen que tiende bogadas de ropa nes sierres d’alredor: «Nesta fonte encomienza El Furacón, un furacu que vei per debaxu tierra de la finca del mesmu nome y unde hai unos buois d’ouru, que fueron escondíos polos moros y pue atopalos quien l.labre la tierra con unos buois ximielgos». La Degol.lada.
Fonte’l Requeixu, La: Fonte que naz en terrén de Ca’l Palaciu, cerca La Ponte’l Requeixu, nel monte del mesmu nome. Los Piñeiros.
Fonte’l Tínfanu La: Fonte d’iviernu, más bien una pocera. En Busecu, n’El Monte la Plana.
Fonte’l Toxu, La: Fonte nel monte del mesmu nome, enfrente Ca la L.linera, nel camín que va a Riupinosu. Ye fonte d’iviernu, con poceres. Busecu.
Fonte’l Val.le, La: Fonte asitiada nun llugar malu, mui pendiente ya fanosu; ye fonte d’iviernu. Concernosu.
Fonte’l Val.le, La: Manantial que naz n’El Zarru del Val.le. Ye una fonte d’iviernu. Los Piñeiros.
Fonte’l Zarru la Sierra, La: Fonte pa la marxe drecha d’El Ríu Negru, d’onde traen l’agua pa casa. La L.linera.
Fonte’l Zarru, La: Fonte nel prau El Zarru. Agora ta seca. Paladeperre.
Fontina Triel.les, La (~ La Fontina de la Canal): Fonte en San Playu de Sesmu, que naz na peña y ta nun prau de Ca Barreiru de Godón, que primero yera de Triel.les.
Fontina, La: 1. Prau que se riega con una fonte del mesmu nome, per un pozu que lu riega con un sistema de tubu d’uralita que fai una especie de sifón y va soltando agua solu. Pertenez a Casa Carmelona en Fontanavia. 2. Fontina cerca de Bardamón, en Las Tercenadas. Tien agua tol añu.
Fontinas, Las: Praos al solanu a la vera Los Pesqueiros. Zreizal.
Fontona, La: 1. Prau asitiáu pal solanu, con parte de regadíu. Dalguna vez sémase de reigás. Zreizal. 2. Fonte con llavaderu y bebederu. Ellí naz un regueiru que vierte n’El Ríu Negru. Llavábase ellí la ropa mentanto nun llegaron les llavadores. Nunca secó hasta estos últimos años, que se resiente de la sequía. Fontanavia 3. Prau que pertenez a Casa Carmelona en Fontanavia. 4. Monte de pinos y ocalitos y un cachu de prau. Los Conqueiros.
Forcadina, La: Monte pa la marxe drecha del ríu, con árboles del país. Barceda.
Forcadinas, Las: Monte de maleza, toxos y dalgún árbol, ocalitos y pinos, a la vera El Camín de los Diestros. San Playu de Sesmu.
Forín, El: 1. Monte en La Casa El Monte. El Teixidal de Baxu. 2. Prau avisíu, de regadíu; un cachu ta d’arboláu. Las Tercenadas.
Fornín, El: Prau de secanu pa pacer, enantes tierra. Los Conqueiros.
Fornu, El: Peñes zarraes en forma de fornu, asitiaes na zona d’El Toxalón. Las Tercenadas.
Foru, El: 1. Prau del Ca’l Bataneiru, a la vera’l ríu, y a continuación el monte Marfón. Paladeperre. 2. Banzáu asitiáu n’El Ríu Negru que daba agua a la presa que regaba’l prau del mesmu nome. Paladeperre.
Freisnu, El: 1. Monte que pertenez a Los Rebol.lares. Llámase asina a esa fastera. Tien tierras, praos ya monte plantáu d’árboles, asitiáu a la vera El Ríu Negru. 2. Monte ya prau que pertenez a Ca’l Rondiel.lu de Fontanavia. Riégase con agua d’El Regueiru la Fontona. Fontanavia.
Freita, La: Prau solanu per debaxo Los Tínfanos. Riégase con agua d’El Ríu Grande. El Mazu.
Fronteiru, El: Monte plantáu d’ocalitu y pinu. Arnizu.
Fucanones, Los: Montes pal avisíu, con árboles del país. Pertenecen a Las Tercenadas y fan llende con Los Conqueiros.
Fuletu Tuertu, El: 1. Regueiru que lleva agua a El Regueirón. Las Tercenadas. 2. Monte asitiáu ente’l regueiru del mesmu nome y El Regueirón. En Las Tercenadas.
Furacón, El: 1. Prau y monte a la vera La Fonte’l Regueiru (La Barrera). Dicen que ta atravesáu por un furacón grande que tien la entrada a la vera la fonte y llega hasta debaxo Ca Pachín y ellí guárdase un tesoru, escondíu polos moros: «unos buois d’ouru, que, según la l.leenda, atoparálos quien l.labre’l terrén con unos buois ximielgos». La Degol.lada. 2. Prau de secanu qu’enantes foi tierra de llabor. Riupinosu. 3. Prau solanu en Los Rebol.lares.
Gal.lega, La: 1. Fonte asitiada en monte del mesmu nome, que seca pel branu. Concernosu. 2. Monte y picos perteneciente a terrén de Busecu, mui llastroso.
Gamayosa d’Abaxu, La: Monte onde se roza ganza, dividío en suertes de tolos vecinos. En La Sierra de la Degol.lada.
Gamayosa d’Arriba, La: Monte onde se roza ganza, asitiáu más p’arriba d’El Picu’l Cuernu. En La Degol.lada.
Ganzu, El: Monte onde se rozaba ganza, pa la parte drecha baxando pa Paladeperre. La Ordovaga.
Garamudel, El: Suertes de monte que fixeron praos varios vecinos. Ta ente El Regueiru la Reguera y Las Pasadas. Siñeiriz.
Gargaya, La: 1. Monte de castañales, carbayos ya bidules al pie d’El Ríu Negru, llugar onde se pesquen munches truches. En La L.linera, ente La Ordovaga y Paladeperre. 2. Praos y banzáu nel mesmu llugar, que y´anun esisten porque lo llevó una riada. En La L.linera, ente La Ordovaga y Paladeperre.
Godón: Pueblu de la parroquia, asitiáu en llende con San Playu de Sesmu, Menudeiru, Caxóus y Barceda.
Grandavil: Finca semada de ballicu en San Playu de Sesmu.
Gruoba, La: 1. Prau solanu, de secanu. La L.linera. 2. Prau y monte, un zarru con baláu, de muncha estensión, de Ca’l Vil.lar. Llega hasta mesmamente El L.lagunayyu. Siñeiriz.
Gruobas, Las: Finques que tán pa la parte d’abaxo del pueblu de Menudeiru y que lleguen hasta’l ríu, a continuación de Los Ribones.
Guórgolas, Las: Zarru zarráu redondu de baláu, sin cava. Cuando nun tien cava’l sucu pertenez al amu’l prau. Zreizal.
Guorta Calea, La: Prau a la vera casa en Las Tercenadas, asitiáu pela parte d’abaxo de la casa.
Guorta Conrado, La: Prau a la vera casa en Las Tercenadas, asitiáu pela parte d’arriba de la casa.
Guorta Cutsu, La: Tierra a la vera casa, pa semar pataques. Los Conqueiros.
Guorta d’Andrés, La: Prau a la vera casa en Las Tercenadas, asitiáu pela parte d’abaxo de la casa.
Guorta d’Antón, La: Prau pela parte d’abaxo de la casa en Las Tercenadas.
Guorta d’Arribacasa, La (~ La Guorta la Era): Finques en Zreizal a la vera casa. Divídeles el camín del pueblu.
Guorta de Bouza, La: Prau en Las Tercenadas. Ta na vera la casa.
Guorta de Casa, La: Prau de secanu a la vera Ca’l L.lagüezu. Zreizal.
Guorta de Pachu, La: Prau a la vera casa en Las Tercenadas, asitiáu pela parte d’arriba de la casa.
Guorta de Ron, La: Prau y un cachu de tierra a la vera la casa del mesmu nome, semada de reigás. Zreizal.
Guorta de Roque, La: Prau y tierra a la vera Ca Roque en Godón.
Guorta de Xuntacasa, La: Prau y tamién tierra onde se sema maíz y pataques. Riupinosu.
Guorta Debaxucasa, La: 1. Prau en Busecu. 2. Prau cuestu, de mal terrén. Riusecu.
Guorta L.lope, La: Prau cerca Ca L.lope en La Carboniel.la.
Guorta l’Aire, La: Finques (o güerta) de Ca’l Peceiru, que foi primero de Ca Manulón. Primero taba de tierra y agora de prau pa seco y pa ensilar. La Degol.lada.
Guorta la Capina, La: Prau ya tierra, que lleva’l nome d’una casa que s’acabó, partida por un camín que va a Ca’l Coxu y pertenez a los de Miguel y a los de Gregoriu. La Ordovaga.
Guorta la Monxa, La: Prau de secanu, pa segar y ensilar. Paez ser qu’ahí hubo una casa pero nun saben dame detalles de cuando s’acabó. Los Conqueiros.
Guorta la Xuana [xwána], La: Prau que llega dende L’Hurtequín, llugar onde taba asitiada Ca la Xuana, hasta El Ríu’l Zurdu. Güei pertenez a Ca Pachín. Lleváronlu munchos años a la renta en Ca’l Peceiru. La Degol.lada.
Guorta Lera, La: Prau de secanu, cerca de les cases. Enantes yera tierra de llabor. Los Conqueiros.
Guorta Lin, La: Prau a la vera casa Lin en Los Rebol.lares, con munchos árboles frutales y onde tamién ta asitiáu’l güertu les berces.
Guorta Mau, La: Güerta xunto a Ca’l Castellanu. La Ordovaga.
Guorta Pachín, La: Tierra xunto a casa, de bona producción. Ta ente’l solanu y l’avisíu. Ye llana ya fácil de trabayar. La Degol.lada.
Guorta Palanquera, La: Prau en Busecu, per debaxo Ca Palanquera.
Guorta Pequena, La: Finca asitiada debaxo la carretera. La Carboniel.la.
Guorta Senciu, La: Prau en Busecu, a la vera la casa del mesmu nome.
Guorta so la Bouza, La: Tierra en Las Tercenadas.
Guorta Xenrín, La: Prau a la vera casa en Las Tercenadas, asitiáu pela parte d’arriba de la casa.
Guorta Xepe, La: Tierra de llabor, más llana que los praos d’alredor. Caxóus.
Guorta, La: 1. Prau solanu asitiáu en La Vil.la de Baxu en Las Tercenadas. 2. Terrén enriba de Ca’l Rondiel.lu. Enantes tierra, agora ta de prau. Fontanavia. 3. Terrén de Ca Carmelona. Güei sémase maíz pa ensilar. Fontanavia. 4. Una tierra asitiada a la mesma vera la Ca’l Tendeiru. Concernosu. 5. Prau y tierra perteneciente a Ca Barcelón. Atraviésala por un camín, tien una parte llana y otra cuesta. Concernosu. 6. Solanu debaxo la casa, con un pedazu de monte no picu con munches mimoses. Equí yera onde taba’l molín, agora en ruines, y la planta la lluz. El Mazu. 7. Praos a la vera les cases, enantes de regadíu. La Carboniel.la. 8. Prau con muchos frutales, a la vera Ca la L.linera. La L.linera. 9. Prau de secanu. Riupinosu. 10. Prau con árboles frutales, de Ca Manulón. Riusecu.
Guorta’l Chicu, La: Prau cerca Ca’l Chicu en La Carboniel.la.
Guorta’l L.louxeiru, La: Prau en Busecu.
Guorta’l Molín, La: Prau en Las Tercenadas.
Guorta’l Regueiru, La: Prau que mira al norte, avisíu. Ye pa segar en verde. Arnizu.
Guorta’l Ríu, La: Prau y monte raso cerca del ríu, pero nun ye de regadíu. Los Conqueiros.
Guorta’l Sarxentu [sarxéntu], La: Prau en Busecu.
Guorta’l Tourín, La: Prau a la vera casa en Las Tercenadas, asitiáu pela parte d’abaxo de la casa.
Guortas d’Arriba, Las: Praos pa ensilar y pa seco. Zreizal.
Guortas, Las: 1. Praos alredor de les cases, plantaos d’árboles frutales, que se dan mui bien, en Fontanavia. Ye terrén llano y protexío. 2. Terrén a la vera casa. Fontanavia.
Guortos, Los: Tierra de llabor y praos. Busecu.
Guortu de Casa Garridu, El: Tierra que se sema de maíz. Riupinosu.
Guortu, El: 1. Güerta cerca La Casa Baxu separada de la casa pol camín que va pa Busecu, agora carretera. Los Rebol.lares. 2. Finca xunto a Ca Ramón d’El Teixidal. Los Rebol.lares. 3. Finca a la vera Ca’l Castellanu. Los Rebol.lares. 4. Prau pequeñu, solanu, de secanu. Riusecu. 5. Prau solanu asitiáu en La Vil.la de Baxo en Las Tercenadas.
Herencia, La: 1. En Concernosu. Un prau avisíu, con un cachu allargáu, asitiáu penriba la pista, per cima El Pradón. Una parte ye de Ca’l Tendeiru y otra d’El Bermeyu. Tán separtaos por paredes y por balseras. 2. Prau cuestu y de mal terrén dempués d’El L.loureiru, pa la parte d’arriba. Riusecu.
Horrios, Los: Monte raso, siguiendo hacia arriba, xunto a La Ripia, tirando pa La Candanosa. Riusecu.
Horriu, L’: Prau alredor d’un horru que ta en pie pero que nun se-y da usu. Según los informantes, l’horru posiblemente antiguamente foi vivienda En Barceda.
Hortiquina, La: Prau solanu, al mediu día, un poco retiráu de la casa. Zreizal.
Hospitalillu, L’: Hospital qu’empezó a construise’l 24 de xunu de 1959. Ellí pasa consulta’l médicu de la zona. Y tamién ye sede de la Comisión de Fiestes.
Hurtequín, L’: Terrenín a la vera Ca la Xuana. La Degol.lada.
Hurtequina, La: 1. Prau a la vera la capilla de Santu Domingo de Guzmán, xunto a Ca Paulinu. La Carboniel.la. 2. Prau en Busecu.
Iérbedu d’Acá, L’ (~ El Yérbedu d’Acá): Llugar que pertenez a Los Piñeiros, onde s’alcuentra la casa del mesmu nome, asitiada a la vera la carretera, a dos kilómetros de La Degol.lada.
Iérbedu d’Al.lá, L’ (~ El Yérbedu d’Al.lá): Llugar que pertenez a Los Piñeiros, onde s’alcuentra la casa del mesmu nome, asitiada a la vera la carretera, a dos kilómetros de La Degol.lada. En Los Piñeiros.
Iérbedu, L’ (~ El Yérbedu): Llugar que pertenez a Los Piñeiros onde s’asienten dos cases. Ta enfrente a La Degol.lada y a la vera la carretera que lleva a L.luarca.
Iglesia de Belén, La: Ilesia asitiada nel pueblu de Belén, capital de la parroquia. La ilesia, nel so asitiamientu actual, tien unos 300 años. La torre tal como ta güei terminóse la víspera de Belén del añu 1953. Primero había namás una capiella dedicada a la Virxe de Belén y la ilesia parroquial taba nel llugar de San Salvador na finca nomada La Iglesia Vieya que pertenez a La Casa Baxu. Taba la ilesia parroquial nel llugar de la finca la ilesia. El camín que pasa per esta finca y que llevaba al Prau La Fonte de Ca’l Pulidu y La Roza de Ca Xuanín, respetóse. El llugar onde s’asentaba antiguamente’l cementeriu llámase El Sesmu.
Iglesia, La (~ La Iglesia Vieya): Prau en Los Rebol.lares. Ruines de l’antigua ilesia parroquial n’honor de San Salvador, patrón de la parroquia. A la vera, nel llugar llamáu El Sesmu, taba l’antiguu campusantu, onde veníen a enterrase xente de Parl.leiru, de L’Artosa y de La Herbedosa, pueblos que yá nun pertenecen a la parroquia de La Montaña. 2. Tierra asitiada en San Salvador, cerca El Ríu Negru. Agora ta de prau y paez ser qu’hai un castru. Bien cerca ta El Monte’l Castru.

Continuar a Toponimia de la Parroquia de La Montaña